Ethiopia News

በገዥው ፓርቲ ውስጥ የተፈጠረው ውጥረት መባባሱ ታወቀ

(BBN News) በስልጣን ላይ የሚገኘው ገዥው ፓርቲ የገጠመው ፖለቲካዊ ውጥረት ተባብሶ መቀጠሉን መረጃዎች አመለከቱ፡፡ በኢትዮጵያ እየተካሄደ ካለው ጠንካራ ህዝባዊ ተቃውሞ ጋር በተገናኘ፣ ቀደም ሲል በፓርቲው ውስጥ የተፈጠረው ውጥረት አሁን ላይ ተባብሶ መቀጠሉን ከምንጮች ገለጻ ለመረዳት ተችሏል፡፡ የመረጃ ምንጮቹ እንደጠቆሙት ከሆነ፣ የፓርቲው ባለስልጣናት የስርዓት ለውጥ እየጠየቀ በሚገኘው ህዝባዊ ተቃውሞ የተነሳ ከባድ መደናገጥ ውስጥ ወድቀዋል፡፡

በዚህ ሰዓት ስልጣናቸውን አስጠብቆ ለመቀጠል የተለያዩ ጥረቶችን እያደረጉ እንደሚገኙ የተነገረላቸው የገዥው ቡድን ሹማምንት፤ በስልጣን ላይ ለመቆየት ማንኛውንም አማራጭ ለመጠቀም መወሰናቸውን መረጃዎች ይጠቁማሉ፡፡ በሀገሪቱ የተፈጠረው ህዝባዊ የተቃውሞ ማዕበል የህሊና እስረኞችን በመፍታት ብቻ ሊቆም እንደማይችል የተረዱት ሹማምንቱ፤ ጠቅላይ ሚኒስትር ኃይለማርያም ደሳለኝን አንስተው፣ በምትካቸው ሌላ ሹም ለማስቀመጥ ሽር ጉድ እያሉ እንደሚገኙም ታውቋል፡፡

ህዝባዊ ተቃውሞዉን ተከትሎ ከወራት በፊት አቶ በረከት ስምዖን እና አቶ አባዱላ ገመዳን ከስልጣን ማንሳቱን የገለጸው ገዥው ቡድን፤ ሆኖም ተቃውሞዉ ባለስልጣናትን ወዲያ ወዲህ በማዘዋወር ሊበርድለት አለመቻሉን ተረድቷል ይላሉ-የፖለቲካ ተንታኞች፡፡ ተንታኞቹ ያክሉና፤ ተቃውሞዉ ከመብረድ ይልቅ እጅጉን እየበረታ መምጣቱን ተከትሎም፤ ጠቅላይ ሚኒስትሩ ስልጣን እንዲለቁ የገዥው ፓርቲ ሹማምንት ስምምነት ላይ መድረሳቸውን ይገልጻሉ-ተንታኞቹ፡፡ አቶ ኃይለማርያም ከስልጣን ለመልቀቅ ደብዳቤ ያስገቡት ዛሬ መሆኑ ቢታወቅም፤ ከዚህ በፊት ተደርጎ በማይታወቅ ፍጥነት፣ የኢህአዴግ ጽ/ቤት ጥያቄአቸውን ዛሬውኑ እንደተቀበላቸው ተነግሯል፡፡

ገዥው ቡድን ከገባበት የፖለቲካ አጣብቂኝ የተነሳ፣ በአቶ ኃይለማርያም ቦታ የሚተካው ሰው በቀጣይ ጊዜ ማለትም በአጭር ቀናት ውስጥ ሊታወቅ እንደሚችል ተገምቷል፡፡ እንደ መረጃዎች ገለጻ ከሆነ ግን፣ ገዥው ፓርቲ በአቶ ኃይለማርያም ደሳለኝ ቦታ ለማስቀመጥ ያቀደው አቶ ለማ መገርሳን ነው፡፡ ሁኔታዎች ወደኋላ ላይ ካልተቀያየሩ በቀር፤ ቀጣዩ ጠቅላይ ሚኒስትር እንዲሆኑ የታሰቡት፣ የኦሮሚያ ክልል ፕሬዚዳንት አቶ ለማ መገርሳ መሆናቸውን መረጃዎች ይጠቁማሉ፡፡ አቶ ለማ በኦሮሚያ ክልል እና በአንዳንድ የስርዓቱ ተቃዋሚዎች ዘንድ ያገኙት መጠነኛ ‹‹ተቀባይነት››፣ ለጠቅላይ ሚኒስትርነት እንዲታጩ እንዳደረጋቸው ምንጮች ገልጸዋል፡፡ ሆኖም ይህ ሹማምንትን ከስልጣን ወደ ስልጣን የማዘዋወር ሁኔታ፣ በኢትዮጵያ እየተካሄደ ያለውን ህዝባዊ ተቃውሞ ያረግበዋል ተብሎ እንደማይታሰብ የፖለቲካ ተንታኞች ተናግረዋል፡፡

Share
0

Facebook Comments

Click to comment

Leave a Reply

Your email address will not be published. Required fields are marked *

The Latest Ethiopia News

To Top