Ethiopia Breaking News

በባህርዳር ዩኒቨርሲቲ ተማሪዎች በፖሊስ እና በልዩ ኃይል ተደበደቡ

ከቤኒሻንጉል ጉምዝና ከኦሮሚያ ክልል የተፈናቀሉ የአማራ ተወላጆችን በተመለከተ የባህርዳር ዩኒቨርሲቲ ተማሪዎች ዛሬ ተቃውሞ ሲያሰሙ ዋሉ:: የክልሉ እና የፌደራል መንግስት ለተፈናቀሉት ወገኖች አፋጣኝ መፍትሄ እንዲሰጥ ጠይቀዋል::

በባህርዳር ዩኒቨርሲቲ የተነሳውን ተከትሎ ጠመንጃ የታጠቁ የክልሉና ፖሊስ እና አድማ በታኝ ከተማውን ከበውት የዋሉ ሲሆን ሰላማዊ ሰልፈኞች ላይ ተገቢ ያልሆነ እርምጃ ወስደዋል::

የቤኒሻንጉልና የኦሮሚያ ክልል አስተዳደሮች በክልላቸው ውስጥ ለሚኖሩ የአማራ ተወላጆች ጥበቃ እንዲያደርጉ; ከድሮ ጀምሮ ወንድማማችነትን እንዲያጠናክሩ; ማፈናቀሉ እንዲቆም የጠየቁት ሰልፈኞቹ የአማራ ክልል ለተፈናቃዮቹ ይሄ ነው የሚባል እርምጃ አለመውሰዱንም ተቃውመዋል:: (የተቃውሞውን ቭዲዮ ይመልከቱ)

“ለወገን ደራሽ ወገን ነው; መጠለያና ዋስትና ለተፈናቀሉ ወገኖች” በማለት ከቤኒሻንጉልና ኦሮሚያ ክልሎች የተፈናቀሉ አማራዎችን መንግስት ምላሽ ይሰጠቸው ዘንድ ድምፅ ለማሰማት አደባባይ የወጡ የባህር ዳር ዩኒቨርሲቲ ተማሪዎች ከዩኒቨርሲቲው ግቢ ወጥተው ወደ ክልሉ ምክር ቤት ሲሄዱ ድብደባ እንደተፈጸመባቸውና ለተፈናቃዮች ያወጡት ገንዘብ እንደተወሰደባቸው ተነግሯል:: ዘ-ሐበሻ ቁጥራቸውን በውል ያላገኘችው መፈክር የያዙ ወጣቶችም መታሰራቸውን ከስፍራው የደረሰን መረጃ ያስረዳል::

ከኦሮሚያም ሆነ ከቤኒሻንጉል ጉምዝ ክልል የተፈናቀሉ ወገኖችን የአማራ ክልል ፕሬዚዳንት አቶ ገዱ አንዳርጋቸው ሄደው አለመጎብኘታቸው እያሰተቻቸው ባለበት በዚህ ወቅት የኦሮሚያ ክልል ኮሙኒኬሽን ቢሮ ሃላፊ ዶ/ር ነገሪ ሌንጮ “የኦሮሚያ ክልላዊ መንግስትም ሆነ የኦሮሞ ህዝብ ሌሎችን የማቀፍ እንጂ የማፈናቀል ባህል የላቸዉም፡፡” በሚል ከኦሮሚያ ክልል ተፈናቀሉ ስለተባለው የአማራ ተወላጆች በፌስቡክ ገጻቸው ምላሽ ሰጥተዋል::

“ሰሞኑን አንዳንድ ሚዲያዎችና የዉጭ ተቋማት ከኦሮሚያ ክልል፣ ከቄለም ወለጋ ዞን፣ ከሰዲ ጨንቃ እና ሰዮ ወረዳዎች፡ ሰዎች እንደተፈናቀሉ አድርገው እያስወሩ ናቸው። እዉነታዉ ግን፣ በ1977 በአገራችን ተከስቶ በነበረው ድርቅ ሳቢያ ከሰሜኑ የሀገራችን ክፍል መጥተው በቄለም ወለጋ ዞን በስድስት ወረዳዎች ማለትም፦ ዳሌ ሰዲ፡ ሃዋ ገላን፡ ሰዮ፡ ላሎ ቅሌ፡ ጅማ ሆሮ እና ሰዲ ጨንቃ ወረዳዎች እንዲሰፍሩ የተደረጉት ወገኖቻችን ላለፉት 33 ዓመታት ቤተሰብና ንብረት አፍርተዉ አስከሁን ድረስ በሰላም እየኖሩ መሆናቸው ነው።

“በሰዲ ጨንቃ ወረዳ አምስት ቀበሌዎች ዉስጥ ቄጦ በመባል በሚጠራው አካባቢ የሰፈሩ ወገኖቻችን ሰሞኑን አንዳንድ ሚዲያዎች እንደሚሉት ሳይሆን እንደሌሎች ወረዳዎች ነዋሪዎች ሁሉ ከአካባቢዉ ህዝብ ጋር በሰላም መኖራቸውን የቀጠሉበት ሁኔታ ነው ያለው፡፡ በእነዚህም ቀበሌዎች 1ኛ. በቄጦ 1 ቀበሌ 850 አባወራዎች (4935 ቤተሰብ)፤ 2ኛ. በቄጦ 5 ቀበሌ 810 አባወራዎች ( 5708 ቤተሰብ)፤ 3ኛ. በቄጦ 6 ቀበሌ 456 አባወራዎች (2302 ቤተሰብ)፤ 4ኛ. በቄጦ 7 ቀበሌ 623 አባወራዎች (3329 ቤተሰብ)፤ 5ኛ. በቄጦ 11 ቀበሌ 655 አባወራዎች (3072 በተሰብ) በድምሩ 3 ሺህ 394 አባወራዎች ወይም 19 ሺህ 346 ቤተሰቦች እየኖሩ ይገኛሉ። ከእነዚህ ውስጥም ሆነ ሰዮ ወረዳና ሌሎች ወረዳዎች ዉስጥ ከሚኖሩት አንድም ሰዉ አልተፈናቀለም፤ የሚያፈናቅላቸዉም አይኖርም፡፡

“በዚሁ በሰዲ ጨንቃ ወረዳ ከላይ ከተጠቀሱት ቀበሌዎች ዉጭ ባለው እጉ ኮፈሌ በተባለው ቀበሌ ውስጥ ከአካባቢዉ ህዝብ ጋር በሰላም ሲኖሩ ከነበሩ መካከል 42 አባወራዎች ቀደም ሲል በአገራችን አንዳንድ አከባቢዎች ተከስቶ የነበረዉን የፀጥታ ችግር በዜና በሰሙበት ወቅት ስጋት ዉስጥ እንደገቡ በመግለፅ ለመሄድ ባሰቡበት ወቅት፣ የአካባቢዉ ህዝብና የወረዳዉ አመራር እንዳይሄዱ ሲለምናቸው የነበረ ቢሆንም እነሱ ግን በጥቅምት ወር 2010 ዓ.ም እንደሄዱ፣ ይህም ሆኖ ከነሱ መካከል 15 አባወራዎች ተመልሰዉ 10 አባወራዎች ንብረታቸዉን ሽጠዉ ሲመለሱ አምስት አባወራዎች ደግሞ ዉክልና ሰጥተዉ መሄዳቸዉ ታዉቋል፡፡

“የአከባቢዉን ህዝብም ሆነ አመራሩን የማይወክሉ አንዳንድ ግለሰቦች ያልተለመደ ባህርይ አሳይቷቸዉ የነበረ ቢሆን እንኳን በህግ አግባብ ማስተካከል እየተቻለ እና ሌሎች ወገኖቻችን በአምስት ቀበሌዎች ዉስጥ እንዲሁም በዞኑ ልዩ ልዩ ወረዳዎች በሰላም እየኖሩ ባለበት ወቅት እነዚህ በቁጥር ጥቂት የሚሆኑ ወገኖቻችን መሄድ አልነበረባቸዉም፡፡ አሁንም ከወረዳዉ አመራርና ከአካባቢዉ ነዋሪዎች በተገኘው መረጃ መሰረት ንብረታቸዉ እንዳይጠፋ፤ መሬታቸዉንም ማንም ሰዉ እንዳያርስባቸዉ ህዝቡና አመራሩ ጠብቀው በማቆየት ላይ ናቸው። ሲመለሱም ተረክበው ኑሯቸውን እንዲቀጥሉ በመጠባበቅ ላይ ናቸዉ፡፡

“ከአማራ ከልላዊ መንግሥት ለማጣራት በተደረገው ጥረት እነዚህ ከሰዲ ጫንቃ እጉ ኮፈሌ ቀበሌ በራሳቸዉ ፍላጎት የሄዱት ሰዎች የተወሰኑት ራያና ቆቦ አከባቢ እንዳሉ ብነገርም በአሁኑ ጊዜ በአማራ ክልል ዉስጥ እንዳልሆኑ ተገምቷል። የትም ቢሆኑ ግን እንደማንኛውም ዜጋ ያለምንም ስጋት ወደ ቄዬአቸዉ መመለስና መኖር እንደሚችሉ፣ ለዚህ ደግሞ የወረዳዉ አመራር አስፈላገዉን ድጋፍ እንደሚያደርገላቸዉ ለማረጋገጥ እንወዳለን፡፡
በቡኖ በደሌ ዞን ዴጋ፤ጮራና ድዴሳ ወረዳዎች ከወራት በፊት ተፈጥሮ በነበረዉና ወድያዉኑ አንዲስተካከል በተደረገዉ አለመግባባት ምክንያት መስተጓገል የደረሰባቸዉን እንዲሁም የአካባቢዉ ህዝብና አመራር እንዳይሄዱ እየለመናቸው ህብረተሰቡን የማይወክሉ የጥቂት ግለሰቦች ትነኮሳን ሰምተዉ በራሳቸዉ ፍላጎት ወደ አማራ ክልል የሄዱትን ሰዎች በተመለከተ ግን የሁለቱም ክልል አመራሮችና የሀገር ሽማግሌዎች እንዲሁም የሰዎቹ ተወካዮች የተሳተፉበት ዉይይት አንደተደረገና መፍትሄ የማፈላለግ ሥራ እየተሰራ መሆኑን ለማሳወቅ እንወዳለን።

በአጠቃላይ መሬት ላይ ያለዉ እዉነታ ከላይ የቀረበውን ይመስላል። ይህን ዕውነታ ወደ ጎን በመተዉ በተለይም በዚህ ሳምንት ነገሮችን እያጋነኑ በማቅረብ በህዝቦቻችን መካከል የኖረውንና በተለይም ደግሞ ከቅርብ ጊዜ ወዲህ እየተጠናከረ የመጣዉን መልካም ግንኙነት ለማደናቀፍ በሚደረግ ሙከራ ህዝባችን እንዳይደናገር እናስገነዝባለን፡፡” ብለዋል ዶ/ር ነገሪ ሌንጮ::

Share
error0

Facebook Comments

The Latest Ethiopia News

To Top