Ethiopia Breaking News

በትግራይ ኢሮብ የሕወሓት/ኢህአዴግን ውሳኔ በመቃወም ሕዝብ ለተቃውሞ አደባባይ ወጣ

የኢሕአዴግ ሥራ አስፈጻሚ ኮሚቴ የአልጀርሱን ስምምነት ተግባራዊ አደርጋለሁ ማለቱን ተከትሎ በትግራይ ክልል የተለያዩ ቦታዎች ቁጣ ተቀስቅሷል:: ሕወሓትም የሕዝቡን ቁጣ ለማብረድ መግለጫ አውጥቷል::

በትናንትናው ዕለት በአዲግራት ከተማ የኢሮብ ማህበረሰብ ተወካዮች ሕዝባዊ ስብሰባ አድርገው ነበር::  የስብሰባው ዓላማም ኢህ አዴግ የአልጀርሱን ስምምነት ከተቀበለ የኢሮብ ማህበረሰብ ለሁለት ይከፈላል በሚል ሲሆን ለዛሬ አርብ ሰላማዊ ሰልፍ ጠርተው ስብሰባው ተጠናቆ ነበር:: በዚህም መሰረት ዛሬ በኢሮብ ዋና ከተማ በሆነችው ዶውሃን ከተማ ማህበረሰቡ የተቃውሞ ሰልፍ አድርጓል::

በተቃውሞውም እኛ ኢትዮጵያዊ እንጂ ኤርትራዊ አይደለንም በመሆኑም ኢህ አዴግ ይህንን የአልጀርስ ስምምነት ከተቀበለ ግማሹ የኢሮብ ማህበረሰብ ወደ ኤርትራ ይካለላል ስለዚህም ውሳኔውን አንቀበልም የሚሉ መልዕክቶች ተሰምተዋል::

ይህ ሕዝባዊ ተቃውሞ ወደ ኤርትራ ወደሚጠቃለሉት ባደመ እና ዛላምበሳም እንደሚቀጥል ከስፍራው የሚመጡ መረጃዎች ያስረዳሉ::  

የትግራይ ሕዝብ ቁጣ ያስደነገጠው ሕወሓት ዛሬ በኢህ አዴግ መግለጫ ዙሪያ መግለጫ ሰጥቷል::  “በኢትዮ ኤርትራ ጉዳይ ላይ የኢህአዲግ ስራአስፈፃሚ ያስተላለፈው ውሳኔ የሁለቱንም ሀገራት ህዝቦች ወንድማማችነት ወደነበረበት በመመለስ የትግራይን ህዝብ ማህበራዊ ኢኮኖሚያዊና ፖለቲካዊ ተጠቃሚነት የሚያረጋግጥ” ነው ያለው ሕወሓት “ይህ የኢህአዲግ የሰላም ጥሪ የኢቲዮጵያ ህዝብ በተለይም የትግራይ ህዝብ ለዓመታት የሚያቀረበውን ጥያቄ ለመመለስ ያለመ ነው ብሏል” በመግለጫው። 

በተለይም በዚህ ዓመት በነበሩ የተለያዩ የህዝብ መድረኮች የትግራይ ህዝብ ከጫፍ እሰከ ጫፍ የኢትዮ ኤርትራ ጉዳይ በሰላም እንዲፈታ እንደ አንድ ሰው ሆኖ ድርጅቱንና መንግስትን ሲጠይቅ በመቆየቱ የተነሳ  ይህን ጥያቄ ለመመለስም ህወሃት ኃላፊነት በተሞላው መንግድ ሰርቶበት ለኤርትራ መንግስት የቀረበ ጥያቄ ነው ብሎታል::

“ላለፉት 20 አመታት በሀገራቱ መካከል የነበረው ሳላምም ጦርነትም የሌለበት ግንኙነት ወደ ነበረበት እንዲመለስና የትግራይ ህዝብ ጥቅም እንዲረጋገጥ ህወሀት ጥረቱን ያጠናክራል  ያለው ሕወሓት “የኢህአዲግ ውሳኔ የሁለቱንም ሀገራት ሰላም የሚያረጋገጥና ጥቅም የሚያስከብር እንጂ በማንኛውም አይነት ሁኔታ የትግራይን ህዝብ ጥቅም የሚጎዳ አይደለም:: ለዚህም በተለየዩ አቅጣጫዎች የሚናፈሱ መሰረት የሌላቸው ወሬዎች ህዝቡ ሊደናገር አይገባም” ብሏል::

“የኤርትራ መንግስት በኢቲዮጵያ በኩል የቀረበለትን የሰላም ጥሪ ለመተግበር ዝግጁ ከሆነ በአልጀርስ ስምምነተ የተላለፉ ውሳኔዎችን እንደ ፓኬጅ ለመተግበር ቀጣይ ንግግር ይጠይቃል:: ውሳኔው በድንበር ብቻ የታጠረ ሳይሆን ብዙ ነጥቦችን የያዘ በመሆኑ የኤርትራ መንግስት ዝግጁ ከሆነ በሁሉም ጉዳዮች እንደፓኬጅ እንጂ ድንበር ላይ ብቻ ትኩረት ያደረገ ውይይትም ሆነ ድድድር አይደለም:: ውሳኔዎቹ እንደፓኬጅ መነጋገርና ዘላቂ መፍትሄ እንዲያገኝ መስራት የትግራይን ህዝብ ጥቅም እንደሚያረጋግጥ ህወሃት ያምናል::” ያለው ሕወሓት 

 የትግራይ ህዝብን ጥቅም በሚፃረሩ ጉዳዮች ላይ እጄን አላስገባም ሲል መግለጫ ሰጥቷል::

በአሁኑ ወቅት በትግራይ የተነሳውን ከፍተኛ ውጥረት ለማርገብ የክልሉ ፕሬዚዳንት ዶ/ር ደብረጺዮን ገብረሚካኤል መግለጫ እንደሚሰጡ የታወቀ ሲሆን በወረዳ ደረጃ ካድሬዎች ተሰማርተው ሕዝቡ የአልጀርሱን ስምምነት እንዲደግፍና ውሳኔው የትግራይን ሕዝብ እንደሚጠቅም በመግለጽ እንዲቀሰቅሱ ታዘዋል:: 

 ይህን ት ዕዛዝ ያስተላለፉትም ዶ/ር ደብረጺዮን መሆናቸውን የደረሰን መረጃ ያሳያል::

Share
0

Facebook Comments

The Latest Ethiopia News

To Top