Ethiopia Breaking News

ዶ/ር ዓብይ አህመድ የመንግስት ባለስልጣናት በውጭ ሃገር ያስቀመጡት ሃብትና የባንክ አካውንት እየተመረመረ መሆኑን አስታወቁ

ጠቅላይ ሚኒስተር ዶ/ር ዓብይ አህመድ የመንግስት ባለስልጣናት በውጭ ሃገር ያስቀመጡት ሃብትና የባንክ አካውንት እየተመረመረ መሆኑን አስታወቁ::

ዛሬ በጠቅላይ ሚኒስትር ጽህፈት ቤት ብዙ የሕወሓት ሰዎች ባይኖሩም ሌሎች የመንግስት ከፍተኛ የሥራ ኃላፊዎችን ሰብስበው በስራዎቻቸውና አሰራር ዙሪያ ገለጻና ማሳሰቢያ እንደሰጡ የተነገረላቸው ዶ/ር ዓብይ አህመድ ሃገሪቱ በአሁኑ ወቅት በውጭ ምንዛሬ እጥረት ምጥ ውስጥ መግባቷን ገልጸው ከዚህ ቀደም በየስብሰባው ላይ ባለስልጣናት እና ባለሃብቶች በውጭ ሃገር ያስቀመጧቸውን ገንዘቦች ወደ ሃገር ቤት በመመለስ ሃገሪቱን እንዲታደጉ ጥሪ ቢያቀርቡም የሰማቸው ማንም የለም ነበር::

ዛሬ ባለስልጣናቱን ሰብስበው ስለአመራር ጥበብ የራሳቸውን ጥናታዊ ጽሁፍ ማስተማራቸው የተገለጸ ሲሆን በዚሁ ወቅት ነው ባለስልጣናት በውጭ ሃገር ባንኮች ያሏቸው ገንዘቦች እየተመረመረ መሆኑን ያስታወቁት:: ሃገራትም የባለስልጣናቱን አካውንት ለማስመርመር ፈቃደኝነታቸውን ማሳየታቸውን ዶ/ር ዓብይ ገልጸዋል::

በተለይ የሕወሓት ከፍተኛ ባለስልጣናት በዱባይ; በ እንግሊዝና በአሜሪካ ባንኮች ከፍተኛ ገንዘብ እንዳላቸው በተደጋጋሚ ሲዘገብ ቆይቷል:: በአሁኑ ወቅት የገንዘብ ላውንድሪ አገልግሎት እየሰጡ ያሉትም እነዚሁ ባለስልጣናት እንደሆኑ በግልጽ የሚታወቅ ሲሆን ጠቅላዩ ደፍረው በነዚህ ባለስልጣናት ላይ እርምጃ ይወስዳሉ አይወስዱም የሚለው የሚጠበቅ ሆኗል::

በቅርብ ከሕወሓት መንደር አፍትልኮ የወጣ ኢሜይል እንደሚያስረዳው በቀድሞው የደህነንት ሹም ክንፈ ገብረመድህን ስም በለንደን የተቀመጥ ከፍተኛ ፓውንድ እንዳለና ይህንንም የሕወሓት ሊቀመንበር ዶ/ር ደብረጺዮን ገብረሚካኤል ለማውጣትና ኪሱ ለመክተት የሚያደርገውን እንቅስቃሴ ነበር:: የዶ/ር ዓብይ ምርመራ ይህንንም እንደሚያካትት የታወቀ ነገር የለም::

የቀድሞዋ ቀዳማዊት እመቤት ወ/ሮ አዜብ መስፍንም በገንዘብ ዝውውር; በአሜሪካ የተለያዩ ከተሞች ቤቶችን በመግዛትና በማከራየት እንዲሁም በተለያዩ ባንኮች ከሃገሪቱ የተዘረፉ ገንዘቦች እንዳሏት ይነገራል:: እንዲሁም አቶ አባይ ጸሐዬም ይጠቀሳሉ የሚሉ ወገኖች አሉ::

ጠቅላይ ሚኒስትሩ በዛሬው ስብሰባቸው ሳምንታዊው የካቢኔ ስብሰባ ከአርብ ወደ ቅዳሜ መለወጡንና ሚኒስትሮች አርብ በስብሰባ ስም ጊዜ ማባካን እንደሌለባቸውና መደበኛ ስራቸውን እንዲሰሩ አስጠንቅቀዋል:: ከስብሰባው በኋላም ባለስልጣናቱን ከአዳራሽ ይዘው በመውጣት በአጼ ሚኒሊክ፣ በአጼ ኃይለሥላሴ እና በደርግ ዘመን የተለያዩ ታሪካዊ ድርጊቶች የተፈጸሙባቸው በቤተመንግስት የሚገኙና እስካሁን ድረስ ዝግ የነበሩ የተለያዩ ክፍሎችን አስከፍተው እንዲጎበኟቸው ማድረጋቸው የደረሰን መረጃ ያመለክታል::

Share
error0

Facebook Comments

The Latest Ethiopia News

To Top